Тошкентда ҳаво сифати ёмонлашди: ҳафта охиригача давом этади
Бундай ҳолатлар тунги ва эрталабки вақтларда қисқа муддатли кузатилиши мумкин.
Тошкентда 6 октябрь куни кундузги вақтда ҳаво сифати асосан «ўртача» даражада бўлган. Кечки соатларда эса вазият ёмонлашиб, 7 октябрь тонгида «сезгир гуруҳлар учун ноқулай» даража кенгроқ ҳудудларда қайд этилган. Айрим жойларда қисқа муддатли «носоғлом» ҳаво сифати ҳам кузатилган.
6 октябрь соат 17:00 да 7 октябрь соат 10:00 гача бўлган кузатувларга кўра, Тошкент бўйича PM2,5 заррачаларининг ўртача миқдори 43,5 мкг/м³, PM10 заррачалариники эса 97,2 мкг/м³ ни ташкил қилган. Халқаро ҳаво сифати индекси (АҚИ) бўйича ўртача кўрсаткич 117 га тенг бўлиб, бу «сезгир гуруҳлар учун ноқулай» даражага мос келади.
Миллий индексация бўйича PM2,5 кўрсаткичи «яшил», PM10 эса «сариқ» даражада қайд этилган. 7 октябрь соат 10:00 ҳолатига PM10 бўйича шаҳар ўртача кўрсаткичи «зарғалдоқ» даражага кўтарилган.
Мутахассислар ҳаво сифатининг ёмонлашишини ифлослантирувчи моддалар тарқалишини чеклаган ноқулай метеорологик шароитлар билан изоҳламоқда. Хусусан, шамол тезлигининг тахминан 1 м/с бўлиши ва тунда кузатилган кучли ҳарорат инверсияси ҳавонинг алмашинуви ҳамда вертикал аралашишини сусайтирган.
6 октябрь соат 23:00 дан 7 октябрь соат 08:00 гача ўтказилган вертикал кузатувларда ҳарорат инверсияси аниқланган. Инверсия қатламидаги ҳарорат фарқи 1,8–6,7 °C бўлган. Бундай шароитда ерга яқин совуқ ҳаво устида нисбатан илиқ ҳаво қатлами ҳосил бўлиб, ифлослантирувчи моддаларнинг юқорига тарқалишини чеклайди.
Қайд этилишича, бундай ҳолатлар ҳафта охиригача асосан тунги ва эрталабки вақтларда қисқа муддатли кузатилиши мумкин. Ҳозирда Тошкент атмосферасидаги ҳаво сифати Махсус комиссия томонидан доимий мониторинг қилинмоқда.
