Польшага ишга юбориш учун 10,4 минг доллар: МЧЖ раҳбари ушланди
У тўрт нафар фуқарони Польшага мавсумий ишга юбориш эвазига пул талаб қилган.
Давлат хавфсизлик хизматининг Наманган вилояти бўйича бошқармаси ҳамда Бош прокуратура ҳузуридаги Департаментнинг ҳудудий бошқармаси ходимлари ҳамкорлигида ўтказилган тезкор тадбирда ноқонуний ҳолат фош этилди.
Аниқланишича, Наманган шаҳрида фаолият юритувчи МЧЖ раҳбари Тўрақўрғон туманида яшовчи фуқаронинг ишончига кириб, уни ва яна уч нафар танишини Польшага мавсумий ишга юборишни ваъда қилган. Бунинг эвазига у жами 10,4 минг АҚШ доллари талаб қилган.
МЧЖ раҳбари олдиндан 4,4 минг доллар олган вақтида ашёвий далиллар билан ушланган.
Ҳозирда ҳолат юзасидан терговга қадар текширув ҳаракатлари олиб борилмоқда.
