“Омборчи” ва “кимёгар” қўлга тушди: Бухорода нарколаборатория фош этилди
Икки фуқаро нарколаборатория ташкил қилиб, синтетик гиёҳвандлик воситаларини тайёрлаш ва сотиш билан шуғулланган.
Давлат хавфсизлик хизмати ходимлари Божхона қўмитаси билан ҳамкорликда ўтказган тезкор тадбирда Бухоро шаҳрида фаолият юритган нарколабораторияни фош этди.
Аниқланишича, Жондор туманида яшовчи 27 ва 29 ёшли икки фуқаро вилоят марказидаги кўп қаватли уйлардан биридаги хонадонда нарколаборатория ташкил қилган. Улар интернет орқали фаолият юритувчи наркодўконда «омборчи» ва «кимёгар» вазифаларида ишлаб, синтетик гиёҳвандлик воситаларини тайёрлаш ва сотиш билан шуғулланган.
Хонадонни кўздан кечириш давомида умумий оғирлиги 6 кг 650 грамм бўлган «спайс» синтетик наркотик моддаси, SIM-карталар, респираторлар, қўлқоплар, зип-пакетлар, электрон тарози ҳамда кўп миқдордаги тамаки маҳсулотлари ашёвий далил сифатида олинган.
Тезкор тадбир давом эттирилиб, Когон туманидаги яширин жойларга кичик бўлакларда беркитилган яна 4 кг 200 грамм «спайс» моддаси ҳам процессуал тартибда расмийлаштириб олинган.
Ҳолат юзасидан Жиноят кодексининг 25, 273 ва 276¹-моддалари билан жиноят иши қўзғатилган. Гумонланувчиларга нисбатан қамоққа олиш эҳтиёт чораси қўлланилган. Ҳозирда тергов ҳаракатлари олиб борилмоқда.
