АҚШ Эрон бўйича ҳарбий сценарийларни кўриб чиқмоқда
Шунингдек, Трамп масалани музокара йўли билан ечишни ҳам қўллаб-қувватламоқда.
АҚШ президенти Доналд Трамп ва унинг маслаҳатчилари Эронга нисбатан эҳтимолий ҳарбий чораларни қайта кўриб чиқмоқда.
The Wall Street Journal хабарига кўра, Покистонда ўтказилган АҚШ–Эрон музокаралари натижасиз якунлангач, Вашингтон бир қатор сценарийларни муҳокама қилмоқда. Улар орасида Эрон ҳудудига нисбатан чекланган зарбаларни қайта бошлаш эҳтимоли ҳам бор.
Шунингдек, тўлиқ кўламли ҳарбий операциялар варианти ҳам кўриб чиқилаётгани қайд этилган. Бироқ мутахассислар бундай сценарий минтақада беқарорликни кучайтириши ва можаронинг янада чўзилишига олиб келиши мумкинлигини таъкидламоқда.
Бундан ташқари, Ҳормуз бўғози орқали кемалар ҳаракатини назорат қилиш мақсадида қисқа муддатли блокада жорий этиш масаласи ҳам кун тартибида турибди. Бу орқали юк ташиш хавфсизлигини таъминлаш учун иттифоқчиларга босим ўтказиш эҳтимоли ҳам муҳокама қилинмоқда.
Шу билан бирга, нашр манбаларига кўра, Доналд Трамп ҳарбий вариантлар кўриб чиқилаётганига қарамай, можарони дипломатик йўл билан ҳал этиш тарафдори бўлиб қолмоқда.
