Исроил ва Ливан вақтинчалик сулҳга эришди
Ҳизбуллоҳ ҳам сулҳга қўшилишга рози бўлган ва Исроилдан қўшинларини олиб чиқишни талаб қилган.
Исроил ва Ливан ўртасида ўт очишни тўхтатиш келишуви кучга кирди. Бу ҳақда АҚШ Президенти Доналд Трамп Исроил Бош вазири Бинямин Нетаняҳу ва Ливан Президенти Жозеф Аун билан мулоқотдан сўнг эълон қилди.
Маълумотларга кўра, дастлаб 10 кун давом этиши режалаштирилган келишув кейинчалик узайтирилиши эҳтимоли бор. Исроил бош вазири Бинямин Нетаняҳу бу сулҳ Ливан билан “тарихий тинчлик битими”га йўл очиши мумкинлигини айтди.
Эрон қўлловидаги Ҳизбуллоҳ сулҳга риоя қилишга рози бўлган. Бироқ ташкилот бутун Ливан ҳудудида ҳужумлар тўлиқ тўхтатилиши ва Исроил қўшинлари эркин ҳаракатланмаслигини талаб қилмоқда.
Нетаняҳунинг айтишича, Исроил қўшинлари Ливан жанубида 10 километр чуқурликдаги “хавфсизлик зонаси”да қолади. Лекин бу “Ҳизбуллоҳ”нинг қўшинларни тўлиқ олиб чиқиш талаби билан мос келмайди.
АҚШ Давлат департаментига кўра, келишувга мувофиқ, Ливан ҳукумати “Ҳизбуллоҳ”нинг Исроилга ҳужумларини олдини олиш учун аниқ чоралар кўриши керак. Шу билан бирга, мамлакат мудофааси учун асосий масъулият Ливан хавфсизлик кучларига юклатилади.
Сулҳ кучга киришидан олдин Исроил мудофаа кучлари Ливан жанубида 380 дан ортиқ нишонга зарба берганини маълум қилди.
Ҳозирча келишувнинг кейинги босқичлари номаълум. Доналд Трaмп Исроил ва Ливан етакчиларини Оқ уйга таклиф қилганини билдирган.
