Садир Жапаров “лайк” сабабли қамалган фуқарони озод қилишга кўрсатма берди
Қирғизистон Президенти Бош прокурорга ҳолатни ўрганиш бўйича кўрсатма берди.
Қирғизистонда ижтимоий тармоқда “лайк” босгани учун қамалган фуқаро билан боғлиқ ҳолат давлат раҳбари эътиборига тушди. Бу ҳақда маҳаллий манбалар xабар бермоқда.
Маълум қилинишича, фуқаронинг бувиси Президентга мурожаат йўллаб, набираси Абдулло Исмоилов ижтимоий тармоқларда “лайк” босгани сабабли 1 йил 7 ойга озодликдан маҳрум этилганини билдирган. Унинг сўзларига кўра, йигит Бишкек шаҳрига олиб кетилган.
Қирғизистон Президенти мазкур ҳолатга муносабат билдириб, фуқарони фақатгина “лайк” босгани учун жазолашни нотўғри деб баҳолаган.
“Прокурор, бу сизнинг ишингиз, бу сизнинг назоратингизда. Лайк учун қўлга олишингиз нотўғри, бу масалани кўриб чиқинг. Текширув ўтказинг. Агар онахоннинг гапи тасдиқланса, йигитни дарҳол озод қилинг. Тушунарлими? Иккингиз ҳам ҳозир ишланг, онахондан маълумотларни олинг. Агар бу ҳақиқат бўлса (озод қилинг), борди-ю бошқа сабаб бўлса, у ҳолда илож йўқ”, — деди Садир Жапаров.
Давлат раҳбари Бош прокурорга ушбу ишни ҳар томонлама ва синчиклаб ўрганиш бўйича топшириқ берди.
