АҚШ ва Эрон сулҳни яна икки ҳафтага узайтиришни кўриб чиқмоқда — Bloomberg
Эрон ҳам, АҚШ ҳам ҳарбий ҳаракатларни қайта бошлашни истамаслиги айтилмоқда.
АҚШ ва Эрон 21 апрелда муддати тугайдиган вақтинчалик сулҳни тинчлик келишуви бўйича музокаралар ўтказиш учун яна икки ҳафтага узайтириш имкониятини кўриб чиқмоқда, дея хабар бермоқда Bloomberg.
Агентлик суҳбатлашган манбанинг айтишича, АҚШ ва Эрон ўртасидаги воситачилар энг баҳсли масалаларни, хусусан, Ҳормуз бўғозида кемалар қатновини қайта тиклаш ва Эроннинг уранни бойитиш муаммосини ҳал қилиш учун техник музокараларни ташкил этишга уринмоқда.
АҚШ расмийларидан бири Блоомберғга сулҳни узайтириш бўйича ҳеч қандай кафолат йўқлигини айтган. Унинг сўзларига кўра, Вашингтон ҳозирча бунга розилик бермаган. Эрон Ташқи ишлар вазирлиги эса вазият юзасидан изоҳ сўралганда жавоб қайтармаган.
Музокаралар жараёнидан хабардор яна бир манба Эрон ҳам, АҚШ ҳам ҳарбий ҳаракатлар қайта бошланишини истамаслигини билдирган.
АҚШ ва Эрон 8 апрелдан бошлаб икки ҳафтага мўлжалланган вақтинчалик ўт очишни тўхтатиш бўйича келишувга эришган эди. Шундан сўнг томонлар Исломободда музокаралар ўтказган, бироқ урушни якунлаш бўйича келишувга эриша олмаган.
The New York Times аввал хабар қилганидек, музокараларда АҚШ Эрондан уранни 20 йил давомида бойитмасликни талаб қилган, Теҳрон эса 5 йиллик муддатни илгари сурган. Музокараларнинг яна бир муҳим мавзуси Ҳормуз бўғози орқали денгиз ташувларини қайта очиш бўлган. Бу бўғоздан одатда дунёдаги нефть етказиб беришларнинг бешдан бири ўтади. Бироқ асосий келишмовчилик нуқтаси Эроннинг ядровий дастуридан воз кечиши масаласи бўлиб қолмоқда.
Pakistan Geo телеканали манбаларга таяниб, АҚШ ва Эрон ўртасидаги музокараларнинг иккинчи раунди келаси ҳафта охирида, 26 апрелгача Исломободда ўтиши мумкинлигини билдирган.
АҚШ президенти Доналд Трамп 14 апрель куни 28 февралда бошланган уруш “якунланишга яқин” эканини айтган.
