Қирғизистонда вилоят ва туманлар тугатилиб, округлар ташкил қилинади
Синов тариқасида битта округ ташкил этилиб, 2–3 йил давомида синовдан ўтказилади.
Қирғизистонда маъмурий-ҳудудий ислоҳотларнинг навбатдаги босқичи доирасида вилоят ва туманларни тугатиб, уларнинг ўрнига 20 та округ ташкил этиш режалаштирилмоқда. Бу ҳақда президент Садир Жапаров Ноокат тумани аҳолиси билан учрашувда маълум қилган.
Жапаровнинг айтишича, ҳозирда мамлакатда 44 та туман ва 33 та шаҳар мавжуд бўлиб, келгусида бошқарув тизими соддалаштирилади.
“Вилоятлар ва туманлар тугатилади, 20 та округ қолади. Соддароқ айтганда, 20 та вилоят шаклланади. Бироқ бу жараён дарҳол эмас, тахминан 3–4 йил ичида амалга оширилади”, — деди Жапаров.
Унинг таъкидлашича, дастлаб тажриба сифатида битта округ ташкил этилиб, 2–3 йил давомида синовдан ўтказилади. Асосий мезон сифатида янги тузилма давлат бюджети дотациясига қарам бўлмасдан фаолият юрита олиши белгиланмоқда.
Агар тажриба муваффақиятли якунланса, мамлакат тўлиқ округлар тизимига ўтказилади.
Президент, шунингдек, маъмурий-ҳудудий ислоҳотларнинг биринчи босқичи муваффақиятли амалга оширилганини қайд этди. Сўнгги икки йил ичида Қирғизистонда айил округлари сони 452 тадан 231 тагача қисқартирилган.
