Жиззахда ФВБ мансабдори пора билан ушланди
У ёнғин хавфсизлиги талабларини бузган муассаса раҳбаридан ишни судга оширмаслик учун пул талаб қилган.
Жиззах вилоятида Фавқулодда вазиятлар бўлими мансабдори пора олишда қўлга олинди. Бу ҳақда ДХХ хабар берди.
Маълум қилинишича, Мирзачўл тумани Фавқулодда вазиятлар бўлими бошлиғи ўринбосари туман марказидаги умумий овқатланиш масканида ўтказилган текширув давомида аниқланган ёнғин хавфсизлиги талаблари бузилиши юзасидан маъмурий баённома расмийлаштирган.
У мансаб мавқеидан фойдаланиб, масканни ёпиб қўймаслик ва тўпланган ҳужжатларни судга юбормаслик эвазига муассаса раҳбаридан 3 миллион сўм пул талаб қилган.
Давлат хавфсизлик хизмати ҳамда Бош прокуратура ҳузуридаги Департамент ходимлари томонидан ўтказилган тезкор тадбирда мансабдор шахс сўралган пулни олаётган вақтида ашёвий далиллар билан ушланган.
Ҳолат юзасидан жиноят иши қўзғатилиб, ҳозирда тергов ҳаракатлари олиб борилмоқда.
