Оқ уй Эрон бўйича учта эҳтимолий сценарийни кўриб чиқмоқда — WP
Ҳокимият ўзгариши сценарийлардан бири сифатида муҳокама қилинмоқда.
The Washington Post нашрининг ёзишича, Оқ уй Эрон атрофидаги вазият ривожи учун учта асосий сценарийни кўриб чиқмоқда. Бу ҳақда нашр шарҳловчиси Девид Игнатиус АҚШ маъмурияти расмийларига таяниб хабар берган.
Маълум қилинишича, биринчи сценарий Эрон ҳукумати ағдарилиши билан боғлиқ. Оқ уй вакилларининг фикрича, бу вариант ҳарбий зарбалар тўхтатилган тақдирда нисбатан эҳтимолийроқ ҳисобланади.
Иккинчи сценарий мамлакатда сиёсий етакчилик алмашинуви юз беришини назарда тутади. Хусусан, янги олий раҳбар сифатида Муҳаммад Багир Ғолибаф каби амалдорларнинг ҳокимият тепасига келиши эҳтимоли тилга олинган.
Учинчи сценарий эса Ислом инқилоби қўриқчилари корпуси таркибидаги қаттиққўл кучлар фаоллашуви билан боғлиқ. Унга кўра, улар қарама-қаршиликни кучайтириш, жумладан, Ҳормуз бўғозидаги блокадани бузиш ёки АҚШни қўшимча ён беришларга мажбурлашга уриниши мумкин.
Таъкидланишича, минтақадаги вазият глобал энергетика хавфсизлиги билан ҳам боғлиқ. Чунки айнан Ҳормуз бўғози орқали жаҳон нефть ва газ таъминотининг муҳим қисми амалга оширилади.
Аввалроқ, Исломободда бўлиб ўтган АҚШ–Эрон музокаралари келишувсиз якунланганидан сўнг, Доналд Трамп томонидан бўғозни блокировка қилиш бўйича кескин баёнотлар янграган эди.
