“Мен шунчаки уларнинг айтганларини қилишим керак эди” — Трамп

 

АҚШ президенти Доналд Трамп июль ойида Туркияда бўлиб ўтган НАТО саммитидан сўнг Анқарани тарк этишда самолётини алмаштирганини тасдиқлади. Унинг сўзларига кўра, қарор хавфсизлик масалалари сабаб Махфий хизмат ва ҳарбийлар тавсиясига биноан қабул қилинган. Бу ҳақда BBС хабар берди.

 

Трамп журналистлар билан суҳбатда Махфий хизмат ва ҳарбийлар унга бошқа рейс ва бошқа самолётда учишни тавсия қилганини айтган.

 

“Мен шунчаки уларнинг айтганларини қилишим керак эди”, — деган АҚШ президенти.

 

Аввалроқ ОАВ Трамп 8 июль куни Анқарадаги аэропортда Air Force One самолётига чиққанидан кейин ундан тушиб, яширин тарзда бошқа ҳарбий самолётга ўтказилгани ҳақида хабар берган эди. Маълумотларга кўра, президент аэропортдаги овқатланиш юк машинаси ёрдамида кўзга ташланмайдиган тарзда С-32А ҳарбий самолётига олиб ўтилган.

 

АҚШ расмийларига кўра, бу қарорга Эрон томонидан самолётга эҳтимолий ракета ҳужуми хавфи сабаб бўлган. СBС News манбаларига кўра, АҚШ томонида бундай таҳдидга оид разведка маълумотлари бўлган. The New York Times эса НАТО саммити яқинида елкадан отиладиган ракета билан кузатилган шахс ҳақида АҚШ разведкаси маълумот олганини ёзган.

 

Трампнинг айтишича, у таҳдид мавжуд бўлган деб ҳисоблайди, бироқ хавфсизлик тафсилотлари ҳақида кўп маълумот сўрамаган. Президент ўзига доим кўплаб таҳдидлар келиб туришини ҳам таъкидлаган.

 

ОАВ хабарларига кўра, президентнинг самолёт алмаштиргани ҳақидаги операция Оқ уй матбуот корпусининг аксарият вакилларидан ҳам яширилган. Air Force One бортидаги журналистлар Трамп самолётни тарк этганини билмаган, уларга эса дераза пардаларини ёпиб қўйиш буюрилган.

 

Кейинчалик Трамп Туркиядан бошқа самолётда учиб кетгани маълум бўлган. У НАТО саммитига Қатар томонидан совға қилинган янги Boeing 747-8 самолётида келган, бироқ мамлакатни тарк этишда эски Air Force One ўрнига С-32А ҳарбий самолётидан фойдаланган.