Қозоғистон Президенти Ерлан Каринни вице-президент этиб тайинлади

Қозоғистон Президенти Қосим-Жўмарт Тўқаев Ерлан Каринни мамлакат вице-президенти этиб тайинлади.

 

31 август куни Остонада янги сайланган Қурултойнинг биринчи ялпи мажлисида Президент Тўқаев Ерлан Карин номзодини вице-президентликка тақдим этди. Овоз беришда иштирок этган 145 нафар депутатнинг 141 нафари унинг номзодини қўллаб-қувватлади, 4 нафари бетараф қолди. Шундан сўнг давлат раҳбари тегишли фармонни имзолади.

 

50 ёшли Ерлан Карин 2019 йилдан буён Қосим-Жўмарт Тўқаев жамоасида турли юқори лавозимларда, жумладан, Президент ёрдамчиси, Давлат котиби ва Давлат маслаҳатчиси сифатида фаолият юритган. 2026 йил 30 июнда у Қозоғистон Президенти Администрацияси раҳбарининг биринчи ўринбосари этиб тайинланган эди.

 

Қозоғистонда 15 март куни ўтказилган умумхалқ референдумида Конституциянинг янги таҳрири қабул қилинди ва у 1 июлдан кучга кирди. Унга кўра, икки палатали Парламент ўрнига бир палатали парламент — Қурултой ташкил этилди. Шунингдек, вице-президент лавозими қайта жорий қилинди.

 

Конституцияга мувофиқ, вице-президент Қурултойнинг кўпчилик овози билан берган розилиги асосида Президент томонидан тайинланади. Вице-президент Қурултой, Ҳукумат ва бошқа давлат органлари билан муносабатларда Президент номидан иш юритиши мумкин. Президентнинг ваколатлари муддатидан олдин тугатилган ёки у вафот этган тақдирда, давлат раҳбари ваколатлари вице-президентга ўтади.

 

Маълумот учун, Қозоғистонда вице-президент лавозими аввал ҳам мавжуд бўлган. Мустақил Қозоғистонда Ерик Асанбаев 1991 йилда вице-президент этиб сайланган. Лавозим 1995 йилда қабул қилинган Конституциядан кейин бекор қилиниб, Асанбаев 1996 йил февраль ойига қадар ваколатларини амалга оширган.