Сувни ортиқча олганларга молиявий жазо: 2027 йилдан янги тартиб кучга киради
Сув олиш лимитидан ошиш, шартномасиз ёки рухсатномасиз сув олиш қоидабузарлик ҳисобланади.
Ҳукуматнинг 2026 йил 21 октябрдаги 585-сон қарори билан қишлоқ хўжалиги, балиқчилик, саноат, энергетика ва хўжалик-маиший эҳтиёжлар учун сув олиш тартибини бузганлик юзасидан молиявий санкцияларни қўллаш тартиби тасдиқланди.
Қарорга кўра, қуйидаги ҳолатлар сув олиш тартибини бузиш ҳисобланади:
-
белгиланган лимитдан ортиқча сув олиш;
-
сув олиш шартномасини расмийлаштирмасдан сув олиш;
-
сув олиш жойларини сувни бошқариш ва ҳисобга олиш воситалари билан жиҳозламаслик;
-
сувдан махсус фойдаланиш учун рухсатномасиз сув олиш;
-
ўзбошимчалик билан сув олиш.
Биринчи марта қоидабузарлик содир этилганда Инспекция юридик шахсни «suvnazorat.uz» электрон платформаси орқали огоҳлантиради ва тегишли кўрсатма беради. Қоидабузарлик 10 кун ичида бартараф этилмаса, молиявий санкция қўлланилади.
Санкция ҳар минг куб метр сув учун базавий ҳисоблаш миқдори (БҲМ) асосида, Сув кодексининг 164-моддасида белгиланган фоиз миқдорида ҳисобланади. Санкция қўлланилганидан кейин бир йил ичида қоидабузарлик такрорланса, унинг миқдори беш баравар этиб белгиланади.
Молиявий санкцияларни тўлаш тартиби
-
Қарор ва санкция ҳисоб-китоби олинган кундан бошлаб бир ой ичида санкция суммасининг 50 фоизи ихтиёрий тўланса, юридик шахс қолган қисмини тўлашдан озод этилади.
-
Санкция суммасини олти ойдан кечиктирмасдан, ҳар ойда камида олтидан бир қисмини тўлаш орқали бўлиб-бўлиб тўлаш мумкин. Дастлабки тўлов бир ой ичида амалга оширилса, ушбу тартиб автоматик қўлланади.
-
Санкция ихтиёрий тўланганида, ҳуқуқий таъсир чораси қўлланилмаган деб ҳисобланади.
Агар санкция бир ой ичида ихтиёрий тўланмаса, Инспекция судга даъво аризаси киритади. Қарор устидан шикоят берилганида, у кўриб чиқилгунга қадар санкцияни қўллаш жараёни ва муддати тўхтатиб турилади.
Суд санкцияни ноқонуний ёки асоссиз деб топса, тўланган маблағлар 15 кун ичида қайтарилади. Маблағ ўз вақтида қайтарилмаган ҳар бир календарь кун учун Марказий банк асосий ставкасининг уч юздан бир қисми миқдорида фоиз тўланади.
