Боткин қабристонида девор қулаб, қабр тошларига зарар етди: қурилиш тўхтатилди
Буюртмачи ва пудрат ташкилотига шикастланган қабр тошларини тиклаш мажбурияти юклатилди.
Тошкент шаҳридаги Боткин қабристонида қурилиш ишлари вақтида девор қулаб тушиб, бир нечта қабр тошларига зарар етди. Бу ҳақда Тошкент шаҳар ҳокимлиги маълум қилди.
Дастлабки ўрганишларга кўра, собиқ шампан винолари заводи ҳудудида олиб борилган қурилиш ишлари вақтида объектни Боткин қабристонидан ажратиб турган девор қулаган. Оқибатда қабристоннинг 15-сектори сўнгги қаторидаги бир нечта қабр тошлари шикастланган. Қабрларнинг ўзи очилиб қолмаган.
Тошкент шаҳар ҳокимлиги ва Шаҳар ободонлаштириш бошқармаси вазиятни назоратга олган. Қоидабузарликлар билан олиб борилган қурилиш ишлари тўхтатилган, масъул шахслар аниқланган. Ҳодиса тафсилотлари ва уларнинг хатти-ҳаракатларига ҳуқуқий баҳо берилади.
Буюртмачи ва пудрат ташкилотига девор қулаши оқибатларини бартараф этиш ҳамда шикастланган қабр тошларини тиклаш мажбурияти юклатилган. Ташкилотлар узр сўраб, ишларни ҳафта охиригача якунлашларини билдирган.
Ҳокимлик марҳумларнинг яқинлари ҳис-туйғуларига ҳурмат билан муносабатда бўлиш муҳимлигини таъкидлаб, тиклаш ишлари назоратда бўлишини ва жараён ҳақида қўшимча маълумот бериб борилишини маълум қилди.
