Талабалар диққатига: бугундан янги автобус қатнови йўлга қўйилди
Янги автобус йўналиши эрталабки тиғиз вақтда метро ва йўллардаги юкламани камайтиришга хизмат қилади.
2026/2027-ўқув йили бошланиши муносабати билан Тошкент шаҳрида талабалар учун янги вақтинчалик автобус йўналиши ташкил этилди.
Тошкент шаҳар ҳокимлиги, Олий таълим, фан ва инновациялар вазирлиги ҳамда Транспорт вазирлиги ҳамкорлигида йўлга қўйилаётган йўналиш бугун — 7 сентябрдан бошлаб «Мирзо Улуғбек» метро бекати ва Ўзбекистон давлат жаҳон тиллари университети (ЎзДЖТУ) ўртасида қатнайди.
Автобуслар эрталабки тиғиз вақтда — 07:00 дан 08:00 гача ҳаракатланади. Йўналишга 4 та катта сиғимли автобус жалб этилади.
Автобуслар «Мирзо Улуғбек» метро бекатидан чиқиб, Чўпонота кўчаси, Қатортол, Тахтагул кўчаси, Кичик ҳалқа айланма йўли, Кўкча Дарвоза ва Заковат кўчалари орқали ЎзДЖТУга етиб боради.
Мазкур йўналиш талабалар учун транспорт қулайлигини ошириш, Чилонзор метросидаги йўловчи оқими юкламасини камайтириш ҳамда эрталабки тиғиз вақтда ушбу ҳудудларда тирбандликларнинг олдини олиш мақсадида ташкил этилмоқда.
