Индонезияда вулқон отилиши сабаб 8 та аэропорт ёпилди
Вулқон куллари тарқалиши оқибатида Жакарта ва Бали аэропортларида авиақатновлар чекланиб, айрим рейслар бекор қилинди.
Индонезияда Анак Кракатау вулқонининг фаоллашиши оқибатида вулқон куллари тарқалиб, мамлакатдаги 8 та аэропорт фаолиятига чекловлар жорий этилди. Бу ҳақда мамлакат Транспорт вазирлиги маълум қилди.
Хусусан, Жакарта яқинидаги Соэкарно-Ҳатта халқаро аэропорти ва Бали оролидаги Нгураҳ Раи халқаро аэропорти фаолиятида узилишлар кузатилмоқда. Айрим ҳудудларда рейслар кечиктирилган ёки бекор қилинган.
Анак Кракатау вулқони июль ойи бошидан буён фаол бўлиб, 4 сентябрь куни унинг фаоллиги сезиларли даражада кучайган. Вулқон отилиши натижасида ҳосил бўлган кул мамлакатнинг бир қатор ҳудудларига, жумладан, Жакарта ва унинг атрофидаги ҳудудларга тарқалган.
Расмийлар аҳолини вулқон кулларидан ҳимояланиш чораларини кўришга, ташқарига чиққанда ниқоб тақишга ҳамда уй ва хоналарнинг дераза, эшик ва шамоллатиш тешикларини ёпиқ сақлашга чақирган.
Шунингдек, вулқон фаоллиги сабаб масофавий таълимга ўтказилган айрим мактабларда бепул мактаб овқатларини етказиб бериш вақтинча тўхтатилиши маълум қилинган.
Ҳозирча вулқон отилиши оқибатида жабрланганлар ҳақида маълумот йўқ. Вазият тегишли хизматлар томонидан кузатиб борилмоқда.
