Ҳар йили 3,5 миллиондан ортиқ ўлим: ЖССТ қўрғошин хавфидан огоҳлантирди

Жаҳон соғлиқни сақлаш ташкилоти (ЖССТ) мамлакатларни аҳолини қўрғошин билан заҳарланишдан ҳимоя қилиш чораларини кучайтиришга чақирди. Ташкилот маълумотига кўра, қўрғошин таъсири ҳар йили дунё бўйлаб 3,5 миллиондан ортиқ ўлимга сабаб бўлиши тахмин қилинмоқда.

ЖССТ қўрғошин таъсирини кенг тарқалган, аммо олдини олиш мумкин бўлган соғлиқ учун хавф сифатида баҳолайди. Юз миллионлаб болалар ушбу заҳарли модда таъсири хавфи остида қолмоқда.

Қўрғошин манбалари қаторига бўёқлар, ошхона анжомлари, косметика маҳсулотлари, зираворлар, саноат ифлосланиши ва чиқиндиларни нотўғри бошқариш амалиётлари кириши мумкин. Ташкилотнинг таъкидлашича, қўрғошин таъсирининг хавфсиз даражаси мавжуд эмас. Ҳатто унинг нисбатан кам миқдори ҳам инсон саломатлигига қайтариб бўлмайдиган зарар етказиши мумкин.

ЖССТ бу ҳақда 18–24 октябрь кунлари ўтказиладиган Халқаро қўрғошин билан заҳарланишнинг олдини олиш ҳафталиги арафасида маълум қилди.

Ташкилотнинг қайд этишича, сўнгги ўн йилликларда бу борада муайян ютуқларга эришилган бўлсада, дунё мамлакатларининг ярмидан камроғида қўрғошин сақловчи бўёқларни чеклаш бўйича қонуний мажбурий чоралар жорий этилган. ЖССТ давлатларни қўрғошин таъсирининг олдини олиш ва аҳоли саломатлигини ҳимоя қилиш бўйича саъй-ҳаракатларни кучайтиришга чақирди.