Зеленский Россиянинг энергетика объектларига зарбаларни 100 кунга тўхтатишга рози бўлди — WSJ
АҚШ сенаторлари Украина президентига Starlink қамровини Россия ҳудудига 300 километрга кенгайтириш эвазига Россиянинг энергетика объектларига зарбаларни тўхтатишни таклиф қилган.
Украина президенти Володимир Зеленский Россиянинг энергетика объектларига ҳужумларни тўхтатиш эвазига Starlink сунъий йўлдош интернети қамровини Россия ҳудудига кенгайтириш таклифига рози бўлишга тайёрлигини билдирган. Бу ҳақда The Wall Street Journal’га таяниб, Point.md ёзди.
Нашр маълумотларига кўра, Киевга ташриф буюрган АҚШ сенаторлари Рожер Уикер ва Кевин Крамер Зеленскийга Россиянинг энергетика объектларига зарбаларни вақтинча тўхтатишни таклиф қилган. Бунинг эвазига Starlink қамровини Россия ҳудудининг ичкарисига тахминан 300 километрга кенгайтириш кўзда тутилган.
WSJ ёзишича, Зеленский зарбаларни 100 кунга тўхтатишга рози бўлишга тайёрлигини билдирган.
Аввалроқ Украина президенти Financial Times нашрига берган интервьюсида АҚШ президенти Дональд Трампга Starlink қамровини Россия ҳудудида кенгайтиришни таклиф қилганини айтган эди. Унинг таъкидлашича, бу Украина кучларига Россиянинг баллистик ракеталарни учириш қурилмаларини йўқ қилиш имконини бериши мумкин.
«Агар сиз биз учун Starlink’ни ўчириб қўймасангиз ва уни Россия ҳудудида ишлатиш имкониятини очиб берсангиз, биз уларнинг баллистик ракеталарни учириш қурилмаларини йўқ қиламиз. Шунда Путин учун ҳаммаси тугайди. У музокаралар столига ўтиради, мен эса энергетика объектларига зарба бермайман. Менга бунинг кераги йўқ», — деган Зеленский.
