Миллий сертификат имтиҳонларига рўйхатдан ўтишда чеклов: сенатор сўрови юборилди

Миллий сертификат имтиҳонларига рўйхатдан ўтишда айрим ҳудудлар учун ажратилган ўринлар тез тўлиб қолаётгани юзасидан сенатор Билим ва малакаларни баҳолаш агентлигига сўров юборди. Унда ўринларни тақсимлаш мезонлари, талабгорлар учун тенг имкониятлар яратиш ва имтиҳонлар қамровини кенгайтириш масалаларига аниқлик киритиш сўралган.

 

Олий Мажлис Сенати аъзоси К. Турсунов Билим ва малакаларни баҳолаш агентлиги директори М. Каримовга сенатор сўрови билан мурожаат қилди.

 

Сўровга ижтимоий тармоқларда миллий сертификат имтиҳонларига рўйхатдан ўтиш айрим ҳудудларда жуда қисқа вақт ичида ёпилиб қолаётгани юзасидан билдирилган эътирозлар сабаб бўлган.

 

Сенатор ҳудудлар ва фанлар кесимида имтиҳон ўринлари қандай мезонлар асосида тақсимланиши ҳамда рўйхатдан ўтиш жараёнида бўш ўринлар ҳақидаги маълумотларнинг очиқлигини таъминлаш учун қандай техник ва ташкилий чоралар кўрилаётгани ҳақида тушунтириш сўраган.

 

Шунингдек, ўринларни белгилашда потенциал талабгорлар сонини ҳисобга олиш, бир ҳудуддаги ўринлар тўлиб, бошқа ҳудудларда бўш жойлар қолганида уларни талаб юқори бўлган ҳудудларга қайта тақсимлаш имконияти юзасидан ҳам саволлар қўйилган.

 

Бундан ташқари, қўшимча ўринлар ажратиш, қўшимча имтиҳонлар ташкил этиш ва имтиҳонлар қамровини кенгайтириш бўйича амалга оширилаётган ишлар ҳақида асослантирилган жавоб бериш сўралган.

 

Қонунчиликда белгиланган тартибга кўра, сенатор сўровига ўн кун ичида жавоб берилиши лозим.