2025 йилда 103 тез тиббий ёрдам хизмати 14,3 миллиондан ортиқ қўнғироқни қабул қилди

 

2025 йил давомида Ўзбекистон бўйлаб 103 тез тиббий ёрдам хизмати томонидан жами 14,3 миллиондан ортиқ қўнғироқ қабул қилинди. Бу кўрсаткич тез тиббий ёрдам тизими фаолиятида рекорд натижа сифатида қайд этилди. Бу ҳақда Соғлиқни сақлаш вазирлиги матбуот хизмати хабар берди.

 

Электрон автоматлаштирилган чақириқларга жавоб бериш тизимининг жорий этилиши натижасида тез тиббий ёрдам бригадаларининг ўртача етиб бориш вақти сезиларли даражада қисқарди. Хусусан, аввал 25–30 дақиқани ташкил этган жавоб бериш вақти 10–15 дақиқагача камайди.

 

Республика шошилинч тиббий ёрдам маркази директори Абдувойжон Ғофуровнинг маълум қилишича, қабул қилинган қўнғироқларнинг асосий қисми — 10,2 миллиони — шошилинч ҳолатларга тўғри келади. Шунингдек, 3,9 миллион қўнғироқ сурункали касалликлар билан боғлиқ бўлган, қарийб 100,5 минг ҳолат эса туғруқ чақириқларини ташкил этган.

 

Ҳудудлар кесимида энг кўп қўнғироқлар Тошкент шаҳрида (1,5 миллион) ва Фарғона вилоятида (1,4 миллион) қайд этилган. Андижон, Сурхондарё ва Наманган вилоятларида эса аҳолининг тез тиббий ёрдамга мурожаатлари сони ҳар бир ҳудудда ўртача 1,3 миллионни ташкил қилган.

 

Навоий, Сирдарё, Жиззах, Бухоро ва Хоразм вилоятларида энг кам қўнғироқлар қайд этилиб, уларнинг сони 416 мингдан 688 минггача бўлган.

 

Маълумотларга кўра, сўнгги саккиз йил давомида тез тиббий ёрдам бригадалари сони 1648 тадан 2865 тагача ошган. Шунингдек, 103 тез тиббий ёрдам хизмат кўрсатиш пунктлари сони 818 тадан 1680 тагача кўпайган.