Россия, Қўшма Штатлар ва Украина делегациялари ўртасида Абу-Дабида бўлиб ўтган уч томонлама музокараларнинг биринчи куни самарали ўтди. Бу ҳақда Оқ уй вакилига таяниб НБС ва Suspilne хабар берди. Музокаралар шанба куни, 24 январь санасида давом эттирилиши маълум қилинди.
Томонлар мулоқотни давом эттиришга келишиб олди. “Ҳеч ким эшикни ёпмаяпти”, — дея манба сўзларини келтиради ТАСС. Қайд этилишича, делегациялар эришилган оралиқ натижалар бўйича ўз пойтахтларига ахборот тақдим этади.
Хавфсизлик масалаларига бағишланган музокаралар ёпиқ форматда ўтказилди. Журналистлар жараёнга таклиф қилинмади ҳамда учрашувлар ўтказилган жой ошкор этилмади. БАА Ташқи ишлар вазирлигининг маълум қилишича, музокаралар Москва вақти билан тахминан соат 18:30 да бошланган.
Украина президенти Владимир Зеленский жамоаси делегациялар турли гуруҳларга бўлиниб, бир нечта форматда музокаралар олиб борганини билдирди. Айрим ҳолатларда иштирокчилар алоҳида муҳокамалар ўтказган, айрим пайтларда эса умумий учрашувлар ташкил этилган.
Зеленский ҳудудий масалани музокараларнинг асосий мавзуси сифатида белгилаган. ТАСС маълумотига кўра, муҳокама қилинган масалалар орасида буфер зона яратиш ва назорат механизмларини жорий этиш масалалари ҳам бўлган.
АҚШ президенти Доналд Трамп Абу-Дабидаги музокаралар келажакда Россия, Украина ва АҚШ президентлари даражасидаги учрашувга олиб келиши мумкинми деган саволга “ҳар қандай учрашув ижобий ҳолат” эканини таъкидлаб, Москвадан муайян ён беришлар кутаётганини билдирди. У шунингдек, Украинадаги можаро яқин вақт ичида ҳал этилишига умид билдирди.
Маълум қилинишича, Абу-Дабидаги музокаралардан аввал Россия президенти Владимир Путин ва Уиткоф ўртасида 4 соатлик учрашув бўлиб ўтган. Унда Вашингтоннинг Киев ва Европа мамлакатлари билан алоқалари, шунингдек, кейинги ҳаракатлар параметрлари муҳокама қилинган.