Ижтимоий тармоқларда Андижон шаҳрида бир қизнинг кўприкдан сакраб ўз жонига қасд қилишга уринаётгани акс этган видео тарқалди. Ҳолат юзасидан ҳуқуқни муҳофаза қилиш органлари расмий изоҳ берди.
Андижон вилояти Ички ишлар бошқармаси матбуот хизмати маълумотига кўра, воқеа бугун, 14 январ тахминан соат 08:00 да Навоий шоҳ кўчасида жойлашган кўприкда содир бўлган. Андижон туманида яшовчи, 22 ёшли фуқаро кўприкка чиқиб, ўз жонига қасд қилиш ниятида бўлгани аниқланган.
Дастлабки маълумотларга кўра, ушбу ҳолатга психоэмоционал муаммолар сабаб бўлган. Хабар келиб тушиши билан ҳуқуқни муҳофаза қилиш органлари ходимлари воқеа жойига зудлик билан етиб келган. Ходимларнинг тезкор ва мувофиқлаштирилган ҳаракатлари натижасида фожианинг олди олинган.
Ҳозирда мазкур ҳолат юзасидан прокуратура органлари томонидан терговга қадар текширув ишлари олиб борилмоқда.
Аввалроқ, Термизда 22 ёшли йигит 16 қаватдан сакраб ўз жонига қасд қилган эди.