Республика миқёсида ўтказилаётган “Хавфсиз ва соғлом юрт” кенг кўламли тезкор-профилактик тадбирлари доирасида Давлат хавфсизлик хизмати ҳамда Ички ишлар органлари ҳамкорлигида Андижон вилояти Бўстон туманидаги йўл-патрул хизмати масканида тезкор тадбир амалга оширилди.
"Андижон – Тошкент" йўналишида ҳаракатланаётган “Lacetti” русумли автотранспорт воситаси белгиланган тартибда тўхтатилиб текширилганда, уни бошқариб кетаётган, Андижон шаҳрида яшовчи, 1984 йилда туғилган Ж.Р.га тегишли 2 кг 994 гр “гашиш” моддаси борлиги аниқланиб, процессуал тартибда расмийлаштириб олинди.
Тезкор тадбир давомида унинг жиноий шериги сифатида 1993 йилда туғилган Ғ.Н. ҳам қўлга олинди.
Маълум бўлишича, улар Қирғиз Республикасидаги наркосавдогарлардан 23 минг АҚШ долларига сотиб олинган ва контрабанда йўли билан мамлакатимизга олиб келинган гиёҳвандлик воситасини Тошкент шаҳрида сотишни режалаштирган.
Айни пайтда ушбу шахсларга нисбатан Жиноят кодексининг 28,246-моддаси 2-қисми (контрабанда) ва 25,273-моддаси 5-қисми (гиёҳвандлик воситалари, уларнинг аналоглари ёки психотроп моддаларнинг ўтказилиши...) билан жиноят иши қўзғатилиб, “қамоқ” эҳтиёт чораси қўлланилган. Тергов ҳаракатлари олиб борилмоқда.