Фарғонада гиёҳванд моддалар савдоси билан шуғулланган шахсларга суд ҳукми ўқилди
Уларга 12 йилдан 15 йилгача озодликдан маҳрум қилиш жазоси тайинланди.
Фарғона вилоятида гиёҳванд моддалар савдоси билан шуғулланган бир гуруҳ шахслар қўлга олинди. Бу ҳақда ДХХ хабар берди.
Маълум қилинишича, аввал наркокурерлар томонидан йирик миқдордаги гиёҳвандлик воситалари Афғонистондан контрабанда йўли билан Сурхондарё вилоятига олиб кирилган. Кейинчалик ушбу моддалар Фарғона вилоятининг Ёзёвон тумани ҳудудидаги дала майдонига яшириб қўйилган.
Ўтказилган тезкор тадбир давомида Марғилон шаҳрида яшовчи 1983 йилда туғилган хусусий тадбиркор ҳамда унинг 1989 йилда туғилган шериги яширин жойдан жами 9 кг 896 грамм “гашиш” моддасини олаётган вақтда ашёвий далиллар билан қўлга олинди.
Шунингдек, қўлга олиш жараёнида воқеа жойидан қочишга уринган тадбиркор ёнидан 14,5 минг доллар ҳамда 6 миллион 250 минг сўм пул маблағлари ҳам мусодара қилинди.
Терговга қадар текширув давомида ушбу жиноятга алоқадор деб топилган Фарғона шаҳрида яшовчи 1980 йилда туғилган фуқаронинг хонадонидан 110 грамм “опий” моддаси, иккита электрон тарози, 1200 доллар ва 28 миллион сўм пул маблағлари аниқланиб, далилий ашё сифатида расмийлаштирилди.
Тергов ҳаракатлари давомида мазкур жиноий гуруҳга 1990 ва 1995 йилларда туғилган ака-укаларнинг ҳам алоқадорлиги аниқланган.
Жиноят ишлари бўйича Боғдод туман суди ҳукмига кўра, жами 5 нафар судланувчи Жиноят кодексининг 246, 273 ва 276-моддалари билан айбдор деб топилиб, уларга 12 йилдан 15 йилгача озодликдан маҳрум қилиш жазоси тайинланди.
