AP: Трамп 8 ноябрдан кейин сайловда иштирок этишини эълон қилади
Собиқ президент бундан олдин ҳам бир неча бор номзодини президентликка илгари суриш истагини билдирганди.
АҚШ Конгрессига оралиқ сайловлардан кейин Дональд Трампнинг тарафдорлари унинг номзодини президентликка илгари суриши мумкин. Бу ҳақда ўз манбаларига таяниб Associated Press хабар берди.
Агентлик билан суҳбатлашган шахслар Трампнинг сиёсий майдонга қайтишни қаттиқ истаётганини айтган. Собиқ Президентнинг тарафдорлари ва ёрдамчилари 8 ноябрдаги оралиқ сайловлардан кейин Трамп президентлик сайловида иштирок этишини эълон қилишини тахмин қилмоқда.
Шу билан бирга агар оралиқ сайлов натижалари бўйича мураккабликлар юзага келса, бу амалга ошмаслиги ҳам мумкин.
Агентликнинг қўшимча қилишича, Трампнинг штаби дастлаб Флоридада жойлаштирилади ва кичик гуруҳда иш олиб боради.
Собиқ президент бундан олдин ҳам бир неча бор сайловда иштирок этиш истагини билдирганди.
