АҚШ президенти Дональд Трамп Россия ва Хитой таъсирининг олдини олиш учун Қўшма Штатлар Гренландияга эгалик қилиши зарурлигини билдирди. У бу ҳақда Оқ уйда журналистлар билан мулоқот чоғида, нефть компаниялари раҳбарлари билан учрашув вақтида маълум қилди. Бу ҳақда Reuters хабар бермоқда.
Трампнинг сўзларига кўра, агар АҚШ ҳозир чоралар кўрмаса, келажакда Гренландия Россия ёки Хитой назорати остига ўтиши мумкин. «Биз Гренландия бўйича бирор нарса қиламиз — хоҳлашса ҳам, хоҳламасалар ҳам. Акс ҳолда Россия ёки Хитой уни эгаллайди. Бизнинг қўшнимиз Россия ёки Хитой бўлмайди», деди у.
Президент АҚШнинг Гренландияда 1951-йилдан буён ҳарбий иштироки борлигини тан олган бўлса-да, бу етарли эмаслигини таъкидлади. Унинг фикрича, фақат эгалик оролни тўлиқ ҳимоя қилиш имконини беради. «Ижара билан ҳимоя қилинмайди, эгалик билан ҳимоя қилинади. Агар биз бунга қўл урмасак, Хитой ёки Россия қилади», деди Трамп.
Маълум қилинишича, Оқ уйда Гренландияни АҚШ назоратига ўтказиш бўйича турли вариантлар муҳокама қилинмоқда. Улар орасида ҳарбий куч ишлатиш эҳтимоли ва Гренландия аҳолисига молиявий тўловлар эвазига Даниядан ажралиб чиқиш таклифлари ҳам бор. Европа давлатлари ва Дания бу баёнотларга кескин муносабат билдириб, Гренландия тақдири фақат Дания ва орол аҳолисининг қарори эканини таъкидламоқда.