АҚШ вице-президенти Камала Харрис ва Украина етакчиси Владимир Зеленский Мюнхен конференцияси доирасидаги биринчи учрашувини ўтказди ва унда Украинадаги вазият муҳокама қилинди.
Америка вице-президенти Қўшма Штатлар Россия агрессиясига қарши Украинани қўллаб-қувватлашда давом этишини таъкидлади.
"Россия ҳарбий ҳаракатларининг кучайиши олдида АҚШ Украина билан бирга. Мен Мюнхенда президент Зеленскийга айтганимдек, биз Украина суверенитети ва ҳудудий яхлитлигига содиқмиз", - деди Харрис баёнотида.
Зеленский, ўз навбатида, томонлар Украина атрофидаги вазиятни дипломатик йўл билан ҳал қилиш йўлларини излашни давом эттиришга келишиб олганини айтди.
"Мен АҚШ вице-президенти Камала Харрис билан муҳим музокаралар ўтказдим. Биз Украина атрофидаги хавфсизлик билан боғлиқ вазиятга баҳо бердик. Биз кескинликни юмшатишнинг дипломатик йўлларини топиш зарурлиги ҳақида бир овоздан фикр билдирдик. АҚШ суверенитети учун давом этаётган самарали ёрдамини қадрлайман”, - деб ёзди у.
Мюнхенда Харрис Германия канцлери Олаф Шольц, Еврокомиссия раҳбари Урсула фон дер Леен ва Греция бош вазири Кирякос Митсотакис билан Украина масаласини алоҳида муҳокама қилган.