Си Цзиньпин Ҳиндистонда: етти йилдан кейинги илк ташриф

Хитой раиси Си Цзиньпин етти йил ичида биринчи марта Ҳиндистонга ташриф буюрди. Бу ҳақда NDTV телеканали хабар берди.

Си Цзиньпиннинг самолёти Ҳиндистон пойтахти Нью-Деҳлидаги Палам ҳаво кучлари базасига қўнган. У BRICS давлат ва ҳукумат раҳбарлари учрашувида иштирок этади.

Ташриф доирасида Хитой раҳбари Ҳиндистон Бош вазири Нарендра Моди билан икки томонлама музокаралар ўтказиши режалаштирилган. Унда икки давлат ўртасидаги муносабатларни ривожлантириш масалалари муҳокама қилинади.

Ҳиндистон ва Хитой ўртасидаги муносабатлар 2020 йил май ойида Шарқий Ладакх ҳудудида икки давлат ҳарбийлари ўртасида юзага келган тўқнашувлардан сўнг кескинлашган эди. Кейинчалик бир қатор ҳарбий ва дипломатик музокаралар ўтказилиб, томонлар баҳсли чегара ҳудудларидан қўшинларини босқичма-босқич олиб чиқишни бошлаган.

Томонлар ўртасидаги алоқалар Нарендра Модининг 2025 йилда Хитойда бўлиб ўтган Шанхай Ҳамкорлик Ташкилоти саммитидаги иштирокидан сўнг аста-секин яхшилана бошлаган. Шундан кейин Ҳиндистон ва Хитой айрим йўналишларда, жумладан, тўғридан-тўғри авиақатновлар ва чегаралараро савдони қайта тиклаган.