Жиззах вилоятининг Арнасой туманида тарихий воқеа рўй берди. Қурилиши давом этаётган замонавий аэропортга илк бор “L-410UVP-E20” русумли самолёт қўнди. Синов парвози нафақат техник имкониятларнитекшириш, балки Арнасой ҳаётида янги давр бошланиши сифатида баҳоланмоқда.
Аэропорт қурилиши ҳудудда туризмни ривожлантириш учун муҳим қадам сифатида кўрилмоқда. Туманда Айдер-Арнасой кўллари бўйида экотуризм кластерлари, дам олиш масканлари ва замонавий инфратузилма лойиҳалари амалга оширилмоқда. Маҳаллий ва хорижий инвесторлар жалб қилиниб, туризм зонаси жадал ривожлантирилмоқда.
Арнасой тумани ҳокими Одил Мусановнинг таъкидлашича, аэропорт нафақат транспорт объекти, балки янги иш ўринлари яратиш, кичик бизнесни ривожлантириш ва иқтисодий юксалишга хизмат қилувчи стратегик лойиҳа ҳисобланади. Аэропорт ишга тушгач, у ички ва халқаро туристларни қабул қилиш имкониятига эга бўлади.
Маҳаллий аҳоли ҳам самолётнинг муваффақиятли қўнишини катта қизиқиш билан қарши олди. Янги аэропорт Арнасойни нафақат Жиззах вилоятида, балки мамлакат миқёсида ҳам муҳим туристлик нуқтага айлантириши, ҳудуднинг иқтисодий ва ижтимоий ривожланишига туртки бўлиши кутилмоқда.