Тошкент 2027 йилги пара енгил атлетика бўйича Жаҳон чемпионатига мезбонлик қилади
Мусобақада 100 дан ортиқ давлатдан қарийб 1 300 нафар спортчи қатнашиши кутилмоқда.
Тошкент шаҳри пара енгил атлетика бўйича катталар ўртасидаги 2027 йилги Жаҳон чемпионатига мезбон сифатида расман тасдиқланди. Бу ҳақда Ўзбекистон Миллий Паралимпия қўмитаси хабар берди.
Қайд этилишича, мазкур нуфузли спорт анжумани Ўзбекистон тарихида илк бор, шунингдек, бутун Марказий Осиё минтақасида ҳам биринчи марта ўтказилади.
Жаҳон чемпионати 2027 йил июнь ойида пойтахтдаги Олимпия шаҳарчаси ҳудудида жойлашган Олимпия стадионида бўлиб ўтиши режалаштирилган.
Мусобақа тартиб бўйича пара енгил атлетика бўйича XIII Жаҳон чемпионати ҳисобланади. Шу билан бирга, у Осиё қитъасида бешинчи бор ташкил этилмоқда. Аввал ушбу турнирга Доҳа (2015), Дубай (2019), Kobe (2024) ҳамда Ню Дели (2025) мезбонлик қилган.
Мусобақада 100 дан ортиқ давлатдан қарийб 1 300 нафар спортчи қатнашиши кутилмоқда. Дастур Паралимпия ўйинлари форматига мос равишда шакллантирилади.
