Сўхда фуқаро ИИО ходимлари сабабли вафот этдими?
Ижтимоий тармоқларда тарқалаётган хабарларга ойдинлик киритилди.
Ижтимоий тармоқларида Сўх тумани Лембур МФЙда яшовчи 1966 йилда туғилган фуқаро ИИО ходимлари сабабли вафот этгани ҳақида хабарлар тарқалди. Ушбу ҳолат бўйича Фарғона ИИБ расмий ахборот бериб, тарқалган хабарлар ҳақиқатга тўғри келмаслигини билдирди.
Маълум бўлишича, фуқаро М.Ҳ. жорий йилнинг 8 апрель куни жамоат жойида спиртли ичимлик ичгани ва маст ҳолатда МТМ да аёллар билан жанжаллашиб, жамоат тартибини бузгани учун МЖтКнинг 187-моддаси билан профилактика инспектори томонидан маъмурий баённома расмийлаштирилган.
Эртаси куни 9 апрелда фуқаро жарима тўлаши кераклигидан хабар топиб, маст ҳолатда бўла туриб, профилактика инспектори билан тортишгани ва уйига юборилган ҳолати кузатув камерасида сақланиб қолган.
Хабарга кўра, ушбу фуқаро сўнги 8-10 кун давомида овқат емасдан фақат спиртли ичимлик истеъмол қилганлиги сабабли саломатлиги ёмонлашиб, 11 апрель куни тиббиёт муассасасининг жонлантириш бўлимига ётқизилган. Кўрсатилган муолажаларга қарамасдан 13 апрель куни шифохонада вафот этган.
Тиббиёт муассасасининг дастлабки хулосасида беморнинг ўлимига сурункали спиртли ичимлик истеъмол қилиш ва алкоголдан кучли заҳарланиш сабаб бўлгани кўрсатилган.
Ҳозирда ҳолат юзасидан прокуратура органлари томонидан терговга қадар текширув ҳаракатлари олиб борилмоқда.
