Россиядан ота-она қарамоғисиз қолган 6 нафар бола Ўзбекистонга қайтарилди
Қайтарилган болалар Тошкент аэропортида кутиб олиниб, оила бағрига топширилди.
Жорий йилнинг 21 апрель куни идоралараро ҳамкорлик ҳамда Россия Федерацияси Ички ишлар вазирлиги билан йўлга қўйилган самарали ҳамкорлик натижасида хорижда ота-она қарамоғисиз қолган 6 нафар вояга етмаган бола Ўзбекистонга қайтарилди. Бу ҳақда Ижтимоий ҳимоя миллий агентлиги матбуот хизмати хабар берди.
Вояга етмаганлар Ислом Каримов номидаги Тошкент халқаро аэропорти орқали пойтахтга олиб келиниб, белгиланган тартибда оила бағрига топширилди.
Ҳозирда болалар ва уларнинг оилаларини ижтимоий қўллаб-қувватлаш, зарур ёрдам кўрсатиш ҳамда доимий мониторинг олиб бориш ишлари яшаш ҳудудлари бўйича «Инсон» ижтимоий хизматлар марказлари томонидан амалга оширилмоқда.
Маълумот учун, мазкур ҳамкорлик доирасида жорий йилнинг март ойида ҳам хорижда ота-она қарамоғисиз қолган 5 нафар вояга етмаган бола Ватанга қайтарилган эди.
