Нукусда халқаро форум бўлиб ўтмоқда
Қорақалпоғистоннинг туризм салоҳиятини кашф қилиш ва уни дунёга таниш учун Нукусда Destination Karakalpakstan — 2026 форуми бошланди.
Бугун Нукус шаҳрида Destination Karakalpakstan — 2026 халқаро форуми бўлиб ўтмоқда. Бу ҳақда воқеа жойида Zamon.uz мухбири маълум қилди.
Мазкур халқаро форум Ўзбекистон Туризм қўмитаси ва бошқа ҳамкор ташкилотлар билан биргаликда ҳудуднинг бой тарихий-маданий мероси, ноёб табиий объектлари ва инвестицион имкониятларини тарғиб қилишни мақсад қилган.
Форумнинг асосий мақсади — Қорақалпоғистонни Марказий Осиёдаги истиқболли туризм дестинацияларидан бири сифатида шакллантириш, янги тур пакетлар яратиш ҳамда халқаро ҳамкорликни кенгайтиришдан иборат.
Қорақалпоғистонда ташкил қилинган Destination форумида Европа ва Осиёнинг 15 дан ортиқ давлатидан, жумладан Франция, Италия, Норвегия, Швейцария, Белгия, Туркия, Босния ва Герцеговина, Россия, Озарбайжон, Қозоғистон, Покистон ва Хитой каби мамлакатлардан етакчи туроператорлар иштирок этмоқда.
