Байден Африка етакчиларини Вашингтонда тўпламоқчи
Декабрда АҚШ-Африка саммити бўлиб ўтади.
Жозеф Байден 13-15 декабрь кунлари Вашингтонда АҚШ-Африка саммитини ўтказади. Бу ҳақда Оқ уй хабар тарқатди.
Учрашувда Африкадаги барча давлат раҳбарлари иштирок этиши айтилган. Бу орқали Вашингтон ушбу қитъа билан муносабатларини мустаҳкамлаш ва бутун дунё учун катта аҳамиятга эга масалалар юзасидан ҳамкорликни кучайтиришни мақсад қилган.
Хусусан, томонлар иқтисодий ҳамкорлик, демократия ва инсон ҳуқуқлари, коронавирус ва бошқа пандемияларга қарши кураш, озиқ-овқат хавфсизлиги ва тинчлик масалаларини муҳокама қилади.
АҚШ-Африка саммити илк бор 2014 йилда ўтказилган, унга Қўшма Штатларнинг ўша пайтдаги раҳбари Барак Обама бошчилик қилган.
Аввалроқ Байден Шимолий Африка ва Яқин Шарққа 1 миллиард доллар ажратгани тўғрисида хабар берилганди.
