Ғазода урушдан зарар кўрган бино қулаб тушди: 21 киши ҳалок бўлди
Бинода бошпанага муҳтож, кўчирилган оилалар яшаётган бўлган.
Ғазо секторида уруш вақтида зарар кўрган олти қаватли бино қулаб тушиши оқибатида камида 21 киши, жумладан саккиз нафар бола ҳалок бўлди. Яна 45 нафар жабрланувчи шифохоналарга олиб кетилган.
Ҳодиса чоршанба куни эрта тонгда Ғазо шаҳрининг Тал ал-Ҳаво ҳудудида юз берган. Гувоҳларнинг BBC'га айтишича, бино бир йилдан ортиқ вақт аввал Исроил зарбасидан кейин бир томонга хавфли тарзда қийшайиб қолган. Шунга қарамай, бошпанага муҳтож кўчирилган оилалар бинода яшашда давом этган.
Қутқарув ишларига БМТ ва Миср гуруҳлари ҳам қўшилган. Бироқ зарур техника етишмагани сабабли дастлаб Ҳамас назоратидаги Фуқаро муҳофазаси ходимлари вайроналар остидан одамларни қўллари билан қидиришга мажбур бўлган.
Гувоҳларнинг сўзларига кўра, бино қулашидан олдин ундан мунтазам равишда тош бўлаклари тушиб турган ва унинг бир томонга қийшайгани кўриниб турган. Вайроналар остидан қутқарув ишлари чоршанба куни тушдан кейин якунланган.
Сунъий йўлдош тасвирлари бино жойлашган ҳудуд урушнинг дастлабки ҳафталарида ҳужумларга учраганини кўрсатади. Бинонинг ўзидаги жиддий зарар эса илк бор 2024 йилда қайд этилган.
