Эронга қочиш: 17 нафар афғон ташналикдан ҳалок бўлди

Эронга ноқонуний йўллар билан ўтмоқчи бўлган 17 нафар афғон, жумладан аёллар ва 18 ёшгача бўлган саккиз киши, кучли ташналик оқибатида ҳалок бўлгани ҳақида хабар берилди. 

 

Haalvsh инсон ҳуқуқлари ташкилоти маълумотига кўра, улар пайшанба куни Эроннинг Сараван шаҳри яқинидаги Ротак чегара ҳудудининг Мак-Сухтеҳ қисмида ҳалок бўлган. Гуруҳ йўл давомида сувсиз қолган.

 

Ҳалок бўлганлар орасида Афғонистоннинг шимолидаги Бағлон вилоятидан бўлган бир оиланинг беш нафар аъзоси ҳам бор. Улар 45 ёшли она ва унинг 14, 16, 18 ҳамда 22 ёшли тўрт қизидан иборат бўлган. Марҳумлар орасида 14 ёшгача бўлган қарийб олти нафар бола ҳам борлиги айтилмоқда.

 

Гувоҳлар ва марҳумларнинг қариндошлари йўл бўйлаб сув жуда кам бўлганини билдирган. Уларнинг сўзларига кўра, одамлар сув топа олмагани сабабли кучли ташналикдан ҳалок бўлган.

 

Haalvsh тарқатган видеода номаълум ҳудудда бир гуруҳ одамлар бир нечта қабр қазиётгани кўринади. Ташкилот бу қабрлар Эронга етиб боришга уринган ва йўлда ҳалок бўлган афғонлар учун қазилганини билдирган.

 

Бағлонлик оиланинг Сараванда яшайдиган қариндошлари бор. Уларнинг маълумотига кўра, ҳалок бўлган беш киши учун жаноза маросими якшанба куни ўтказилиши кутилмоқда.

 

Haalvsh ҳалок бўлганларнинг умумий сони ҳақидаги маълумотни мустақил равишда тасдиқлай олмаганини қайд этди.

 

Аmu ТV қайд этишича, бу афғонларнинг Эронга бориш йўлида ҳалок бўлиши билан боғлиқ илк ҳолат эмас. Август ойи бошида Афғонистоннинг жануби-ғарбидаги Нимроз вилоятида жойлашган жазирама Маргов чўли орқали Эронга ўтишга уринган Ҳаётуллоҳ ва яна 18 киши бедарак йўқолганди. Кейинчалик улар кучли иссиқ ва сув етишмаслиги оқибатида ҳалок бўлгани хабар қилинган.

 

Хабарга кўра, кўплаб афғонлар қашшоқлик, ишсизлик ва хавфсизлик билан боғлиқ муаммолар сабаб мамлакатни тарк этмоқда. Уларнинг айримлари Эронга етиб бориш учун контрабандачилар хизматидан фойдаланиб, оғир табиий шароитдаги ҳудудлардан ўтишга мажбур бўлади.