Жорий йилнинг 5 март куни Тошкентнинг Яшнобод тумани, Истиқлол кўчасида жойлашган Халқаро форумлар саройи биноси ёнида тўпланган 50 га яқин ёшлар “Рёдан” ҳаракатига қўшилиш ҳақида турли шиорлар билан чиқишди.
Бунгача ички ишлар органларига ушбу ҳаракат ташкилотчилари мамлакатимиздан ташқарида жойлашган бузғунчи кучлар экани, уларнинг мақсади миллий, ирқий, этник ва диний адоватни, шунингдек, тартибсизликлар, зўравонликни тарғиб қилиш экани ҳақида турли маълумотлар келиб тушган.
Шундан келиб чиқиб, Тошкент шаҳар ички ишлар бошқармаси фуқароларни ижтимоий тармоқларда бузғунчи шиорлар таъсирига тушиб қолиш ва нотаниш кимсалар таъсирига тушиб қолиш хавфидан огоҳлантирганди.
Натижада жорий йилнинг 5 март куни жамоат тартибини бузиш ҳолатларининг олдини олиш мақсадида Тошкент шаҳар ИИББ томонидан профилактика тадбирлари ўтказилиб, ота-оналар ва ҳодиса иштирокчилари билан суҳбатлар ўтказилди.
Бузғунчи кучларнинг ёшларимизга таъсиридан далолат сифатида ҳаракат иштирокчиларининг “Салом, бугун соат 18:00 да бутун форумни **** бузамиз. Биз пневматик, совуқ ва жанговар қуроллар билан тишимизгача қуролланамиз”, деган шиорлар, шунингдек, ижтимоий тармоқларда ҳуқуқни муҳофаза қилиш органларининг ҳаракатларини обрўсизлантиришга уринишлар билан аноним фойдаланувчиларнинг видеолари тарқатилди.