Россия Туркия ва БМТ воситачилигида Украина донини экспорт қилиш бўйича келишувни узайтиришга рози бўлиши кутилмоқда. Бу ҳақда “Bloomberg” нашри ёзмоқда.
Амалдаги келишув 19 ноябрда тугайди. Россия келишувни узайтиришга рози бўлган, бироқ Москва бундай узайтириш эвазига янги талаблар қўядими ёки йўқми, аниқ эмас.
Бирлашган Миллатлар Ташкилоти Москвага Россия озиқ-овқат ва ўғитларини Қора денгиз орқали тўсиқсиз экспорт қилишда ёрдам беришга ваъда берди.
Бироқ дон шартномасининг узайтирилиши ҳали расман эълон қилинмаган. Кремл матбуот котиби Дмитрий Песков Россия бу борадаги қарорини зудлик билан эълон қилишини айтди.
Тасдиқланган шартларга кўра, агар битим тарафларидан ҳеч бири уни бекор қилишга ёки қабул қилинган ҳужжат матнини қандайдир тарзда ўзгартиришга қарор қилмаса, 19 ноябр куни келишув автоматик равишда яна 120 кунга узайтирилади.