Сўнгги саккиз йил давомида мамлакатимизда таълим соҳасида хусусий сектор фаол ривожланиб, натижада 31 мингдан ортиқ хусусий мактабгача таълим муассасаси ҳамда 645 та хусусий умумтаълим мактаби ташкил этилди. Бу ҳақда Президент матбуот котиби Шерзод Асадов маълум қилди.
Эндиликда мактабгача таълим қамрови 70–80 фоиздан паст бўлган 80 та туманда тадбиркорлар учун қўшимча қулайликлар жорий этилмоқда.
Унга кўра:
бўш ер майдонларида давлат-хусусий шериклик асосида боғчалар қуришга рухсат этилади;
ер учун ижара тўлови 30 йил давомида ундирилмайди;
давлат боғчаларида бир бола учун ажратиладиган харажатларнинг ярми тадбиркорларга субсидияланади.
Шунингдек, бошқа жойларда боғча ташкил этишни истаган тадбиркорлар қуйидаги имтиёзларга эга бўладилар:
7 йил муддатга 5 миллиард сўмгача 18 фоиз ставкада имтиёзли кредит ажратилади;
фаолият йўналишини ўзгартирмаслик шарти билан ер текинга берилади;
ижтимоий солиқ ставкаси 1 фоиз этиб белгиланади;
тарбиячиларнинг маоши уч йилгача давлат томонидан қоплаб берилади.
Мазкур чоралар хусусий таълим муассасалари улушини ошириш, таълим сифатини яхшилаш ва тадбиркорликни янада қўллаб-қувватлашга хизмат қилади.