Буюк Британияда масжидларни ҳимоя қилиш бўйича янги дастур эълон қилинди
Ҳукумат масжидлар ва мусулмон марказлари хавфсизлигини таъминлаш учун 13,3 миллион доллар ажратади.
Буюк Британия ҳукумати мамлакатдаги масжидлар ва мусулмон диний марказларида хавфсизлик чораларини кучайтириш мақсадида 10 миллион фунт стерлинг (тахминан 13,3 миллион доллар) миқдорида қўшимча маблағ ажратади.
Бу ҳақда Британия ҳукумати матбуот хизмати баёнотида маълум қилинди.
Ажратилган маблағ видеокузатув тизимларини ўрнатиш, сигнализация воситаларини янгилаш, ҳимоя панжараларини қуриш ва хавфсизлик хизматларини молиялаштиришга йўналтирилади.
Ушбу ташаббус ўтган йили масжидлар хавфсизлигини таъминлаш учун ажратилган 29,4 миллион фунт стерлинглик дастур доирасининг давомидир.
Қарор Бош вазир Кей Стармернинг Англиянинг Пишавен шаҳридаги масжидга ташрифи чоғ‘ида эълон қилинган. Маълум қилинишича, ушбу масжид октябрь ойи бошларида номаълум шахслар томонидан ёқиб юборилган эди. Ҳодиса оқибатида жабрланувчилар қайд этилмаган.
Ҳукумат вакилларининг таъкидлашича, янги маблағ диний масканларда тинчлик, бағрикенглик ва хавфсизликни таъминлашга қаратилган комплекс чоралар тизимини янада мустаҳкамлайди.
