Чехияда минглаб одамлар намойишга чиқди
Ҳукуматдан ёрдам талаб қилинган намойиш мамлакат касаба уюшмалари конфедерацияси томонидан уюштирилган.
8 октябрь куни Праганинг Вацлав майдонига энергия ва озиқ-овқат нархларининг ошишига қарши бир неча минг киши намойишга чиқди. Бу ҳақда DW хабар берди.
Улар ҳозирда ойига 644 еврони ташкил этувчи энг кам иш ҳақини оширишни, шунингдек, кундалик уй-рўзғор буюмлари нархларини давлат томонидан тартибга солишни талаб қилишди.
Таъкидлаш жоизки, Миллий статистика бошқармаси маълумотларига кўра, август ойида Чехияда нархларнинг ўсиши йиллик кўрсаткичда 17,2 фоизни ташкил этди. Фавқулодда чора сифатида Бош вазир Петр Фиала бошчилигидаги ўнг марказчи ҳукумат ноябрь ойининг бошидан бошлаб уй хўжаликлари ва кичик бизнес учун электр ҳамда газ нархларига чекловлар киритди.
