Чилининг Кокимбо вилоятида кечаси содир бўлган йирик йўл-транспорт ҳодисаси камида 6 кишининг ҳаётига зомин бўлди, яна 40 дан ортиқ одам жароҳатланди.
БиоБио радиостанциясининг хабарига кўра, аввалига бир автобус йўлда ағдарилиб кетган, шундан сўнг икки бошқа автобус ҳайдовчилари тўхтаб, жабрланганларга ёрдам беришга ҳаракат қилган. Шу вақтда катта тезликда келаётган яна бир автобус тўхтаб турган транспорт воситаларига урилган. Гувоҳларнинг айтишича, ушбу автобус ҳаддан ташқари тез юрган.
Авария тунда содир бўлгани туфайли қутқарув операцияси мураккаблашган. Қурбонлар орасида ҳалокатга сабаб бўлган автобус ҳайдовчиси ҳам бор.
Маълумотларга кўра, 12 нафар йўловчи оғир аҳволда шифохонага ётқизилган. Расмийлар ҳодиса тафсилотларини ўрганмоқда.