Сурхондарё вилоятининг Жиноят ишлари бўйича Денов туман суди раиси йўл транспорт ҳодисасига учрагани маълум бўлди. Судьялар олий кенгаши матбуот хизмати воқеа тафсилотларини очиқлади.
Келтирилишича, ЙТҲ оқибатида у билан битта автомашинада бўлган адвокат ҳалок бўлиб, судьянинг ўзи турли даражада тан жароҳати олган. Ҳолат юзасидан 9 март куни хизмат текшируви ўтказилган, унда Судьялар одоби кодекси талаблари бузилгани аниқланган.
Текширув хулосасини Сурхондарё вилояти судлари судьялар малака ҳайъати муҳокама қилган ва туман суди раисининг ваколатларини муддатидан илгари тугатиш бўйича қарор чиқарган. Мазкур қарорга нисбатан берилган шикоятлар эса рад этилгани айтилади. Судьялар олий кенгаши тармоқларда тергов ишлари тугамаганига қарамай суд раисининг ишдан кетгани барвақт хулосага келиш дея талқин қилинган хабарларни рад этди.
"Фожиа содир бўлган пайтда автомашина бошқарувида судья (суд раиси) бўлганига оид ахборотлар ҳам йўқ эмас", - дея қўшимча қилди Судьялар олий кенгаши.