Доллар яна “парвоз қилишда” давом этмоқда
Бу сафар ноябрь ойидаги кўтарилиш ҳам “ухлади”.
Бир қанча банкларда доллар курси илк бор 10 850 сўмга кўтарилди. Бу ҳақида Spot.uz сайти хабар берди.
Унда айтилишича, айни вақтда банкларда доллар сотиб олиш - 10 740 дан 10 790 сўмгача оралиқда. Сотиш эса 10 850 сўмга чиққан.
Маълумот учун, бундан олдин курс ноябрь ойи охирида кетма-кет икки марта энг юқори кўрсаткичга кўтарилган эди. Яъни, 29 ноябрь куни банклараро курс 10 830 сўмга етган бўлса, 30 ноябрда курс 10 840 сўмни ташкил қилган.
Манбанинг хабарига кўра, энг арзон доллар “Капиталбанк”да сотилмоқда(10 830 сўм). Энг қулай сотиб олиш эса “Универсалбанк”, “Asia Alliance Bank”, “Трастбанк”, “Промстройбанк” ва “Капиталбанк” томонидан амалга оширилмоқда(10 790 сўм).
Марказий банк маълумотларига кўра, 2021 йилнинг январь-октябрь ойларида сўм атиги 2 фоизга қадрсизланган. Ноябрь ойида девалвация бироз тезлашиб, энди йилига 3% ни ташкил қилмоқда. Шунга қарамай, амортизация даражаси сўнгги бир неча йил ичида энг паст бўлиб қолмоқда.
“Бироқ 2022 йилда Ҳисоб палатаси долларнинг ўртача йиллик курсини 11300 сўм деб кутмоқда”, - дейилади хабарда.
Аввалроқ долларнинг расмий курси тўрт кунлик ўсишдан сўнг бироз пасайгани ҳақида хабар берилганди.
Оламгир Абдиев
