Адлия вазирлиги “Таълим ташкилотларида тўлов-контракт шакли ва ундан тушган маблағларни тақсимлаш тартиби тўғрисида”ги низомга киритилган ўзгартиришларни давлат рўйхатидан ўтказди (рўйхат рақами: 2431-5, 21.11.2025). Мазкур ҳужжат олий таълим ташкилотларида контракт асосида ўқиш учун тўловларни амалга ошириш тартибини янада аниқ белгилаб берди.
Янги тартибга кўра, контракт суммасининг камида 25 фоизи абитуриентлар учун 15 сентябргача, юқори босқич талабалари учун эса 1 октябргача тўланади. Шунингдек, тўловнинг камида 50 фоизи 1 январгача, 75 фоизи 1 мартгача ва 100 фоизи 1 майгача амалга оширилиши лозим. Мазкур муддатлар олий таълим ташкилоти ректори ёки Давлат комиссияси қарорига кўра узайтирилиши мумкин.
Бундан ташқари, янги ўзгартиришларга мувофиқ, ОТМлар талабаларнинг ижтимоий ҳимоясини кучайтириш мақсадида уларга моддий ёрдам кўрсатиш ҳуқуқига эга бўлади. Эндиликда олий таълим муассасалари бир талаба учун йилига меҳнатга ҳақ тўлашнинг энг кам миқдорининг 6 баробаригача моддий ёрдам ажратиши мумкин. Бу янгилик талабаларнинг молиявий юкини енгиллаштиришга хизмат қилиши кутилмоқда.