Эрдўған Трамп билан Венесуэладаги вазиятни муҳокама қилди

 

Туркия президенти Ражаб Тоййиб Эрдўған АҚШ президенти Дональд Трамп билан Венесуэладаги вазият юзасидан телефон орқали суҳбатлашганини маълум қилди. Бу ҳақда СNN Турк хабар берди.

 

Давлат раҳбарининг сўзларига кўра, телефон мулоқоти чоғида Туркия томонининг мазкур вазият борасидаги хавотирлари АҚШ президентига етказилган.

 

“Президент Дональд Трамп билан телефон орқали суҳбат давомида мамлакатимизнинг Венесуэладаги жараёнлар бўйича хавотирларини билдирдик”, — деди Эрдўған.

 

У суверенитетнинг бузилиши ва халқаро ҳуқуқ нормаларига амал қилинмаслиги глобал миқёсда жиддий муаммоларга олиб келиши мумкин бўлган хавфли ҳолат эканини таъкидлади. Эрдўған қонун устуворлиги ўрнини куч устунлиги эгаллаган шароитда беқарорлик, инқирозлар ва низолар муқаррар эканини қайд этди.

 

Туркия етакчиси Венесуэла халқини дўстона халқ сифатида баҳолаганини ва мамлакатни қўллаб-қувватлашда давом этишини билдирди.

 

Эслатиб ўтамиз, 5 январ куни Венесуэла президенти Николас Мадуро устидан суд жараёнининг илк мажлиси Нью-Ёрк федерал судида бўлиб ўтди. АҚШ бош прокурори Пам Бонди Мадуро ва унинг рафиқасини «наркотерроризм», қурол сақлаш ҳамда гиёҳванд моддалар контрабандаси айбловлари билан судга тортилганини маълум қилди. Судья ишни давом эттириш учун навбатдаги мажлисни 17 март санасига белгилади.