Эрондаги намойишларда Ўзбекистон фуқаролари жабрланмаган — ТИВ
Эрондаги вазият юзасидан Ташқи ишлар вазирлиги баёнот берди ва фуқароларни огоҳликка чақирди.
Эронда давом этаётган норозилик намойишлари чоғида жабрланганлар орасида Ўзбекистон фуқаролари қайд этилмаган. Бу ҳақда 14 январ куни Ўзбекистон Республикаси Ташқи ишлар вазирлиги матбуот котиби Аҳрор Бурхонов маълум қилди.
Унинг таъкидлашича, мазкур маълумот Ўзбекистоннинг Эрондаги дипломатик ваколатхонаси томонидан тақдим этилган бўлиб, вазирлик мамлакатдаги вазиятни доимий равишда диққат билан кузатиб бормоқда.
Шу билан бирга, ТИВ Эронда бўлиб турган Ўзбекистон фуқароларини митинг ва намойишларда иштирок этмасликка, одамлар гавжум бўладиган ҳудудлардан йироқ бўлишга ҳамда шахсий хавфсизлик қоидаларига қатъий амал қилишга чақирди.
Зарур ҳолларда фуқаролардан Ўзбекистон Республикасининг Теҳрондаги элчихонасига мурожаат қилиш сўралмоқда.
