Фермерларга чорвачилик учун ўз ерида бино қуришга рухсат берилади
Фермерларга 2025 йил ҳосили қийматининг 50 фоизигача 12 фоизли кредитлар ажратилади, картошка уруғчилигига бепул мини-туганаклар етказилади.
Президентнинг қишлоқ хўжалиги соҳаси ходимлари билан ўтказилган учрашувда бозорларда нархлар барқарорлигини таъминлаш ҳамда озиқ-овқат хавфсизлигини мустаҳкамлаш чоралари муҳокама қилинди.
“Куз-қиш мавсумида асосий турдаги маҳсулотлар захирасини шакллантирдик. Энди бу жараён йил давомида амалга оширилади ва нархларни барқарор ушлаб туриш учун доимий интервенция тизими йўлга қўйилади”, — деди давлат раҳбари.
Юқори талабга эга бўлган озуқабоп, мойли экинлар ва картошка етиштирувчиларни қўллаб-қувватлаш учун янги механизмлар жорий этилади. Хусусан, келгуси йилда фермерларга 2025 йилда олинадиган ҳосил қийматининг 50 фоизигача Қишлоқ хўжалиги жамғармаси ҳисобидан 12 фоизли кредитлар ажратилади.
Хорижий валютадаги кредитларда 8 фоиздан ортиқ ставка қисми қоплаб берилади, кредитларнинг 50 фоизгача қисмига кафиллик тақдим этилади. Ҳар йили «ин-витро» лабораторияларда вирусдан холи 10 миллиондан ортиқ картошка мини-туганаклари ишлаб чиқарилиб, уруғчилик хўжаликларига бепул тақдим этилади.
Чорвачиликни ривожлантириш ҳам муҳим йўналиш сифатида белгиланди. Келгуси йилда четдан 100 минг бош қорамол ва 200 минг бош қўй-эчки олиб келиш режалаштирилган. Пахта ва ғалла йўналишидаги фермерларга ўз ерида чорвачиликни йўлга қўйиши учун 20 сотихгача майдонда енгил конструкциядаги бино қуришга рухсат берилади.
Наслдор қорамол ва бир кунлик жўжа импорти бўйича субсидиялар бериш тартиби яна 5 йилга узайтирилади. Чорвачилик лойиҳаларини молиялаштириш учун кейинги йилда Жаҳон банки ва Қишлоқ хўжалигини қўллаб-қувватлаш жамғармаси маблағлари ҳисобидан 157 миллион доллар йўналтирилади. Ушбу кредитлар 10 йиллик муддатга, 3 йиллик имтиёзли давр билан 17 фоизлик ставкада берилади.
Шунингдек, қўшимча равишда JICA’дан 150 миллион доллар ва Осиё тараққиёт банкидан 60 миллион доллар жалб этилади. Бу ресурслар чорвачиликни кенгайтириш, келгуси йилда қиймати 5 триллион сўмлик 1 мингта лойиҳани амалга оширишга хизмат қилади. Франция тажрибаси асосида 167 та туманда 50–60 бош қорамолга мўлжалланган 340 та кичик чорвачилик хўжалиги ташкил этилиши белгиланган.
