Филиппин қирғоқлари яқинида йўловчи паром чўкиб кетиши оқибатида етти киши ҳалок бўлди. Ҳодиса вақтида паром бортида жами 350 киши, жумладан 27 нафар экипаж аъзоси бўлган. Камида 215 нафар йўловчи қутқариб қолинган. Бу ҳақда РБК расмий манбаларга таяниб хабар берди.
Маълум қилинишича, ороллараро юк ва йўловчи ташишга мўлжалланган M/V Trisha Kerstin 3 пароми Замбоанга порт шаҳридан Сулу провинциясидаги Жоло оролига йўл олган. Сафар давомида кема техник носозликка дуч келган ва шундан сўнг чўкиб кетган бўлиши мумкин.
Филиппин Соҳил қўриқлаш хизмати хабарига кўра, қутқарув ишлари тезкор тарзда бошланган. Басилан ороли губернатори Мухив Хатаман портга олиб келинган йўловчилар ҳақида маълумот бериб, 37 нафар киши қабул қилинганини, бироқ уларнинг икки нафари ҳалок бўлганини маълум қилди.
Расмийларнинг таъкидлашича, Филиппин архипелагида бўронлар тез-тез кузатилиши, кемаларнинг техник ҳолати ёмонлиги, йўловчилар сонининг меъёрдан ошиб кетиши ҳамда хавфсизлик қоидаларига етарлича риоя қилинмаслиги сабабли денгиздаги бахтсиз ҳодисалар, айниқса чекка ҳудудларда, тез-тез содир бўлмоқда.