Франция электрон сигаретдан воз кечмоқчи
Мамлакатда ҳар йили 75 минг киши чекиш туфайли вафот этади.
Франция Бош вазири Элизабет Борн RTL радиосида нутқ сўзлади ва мамлакат бир марталик вейпни тақиқлашни режалаштираётганини маълум қилди. Бу ҳақда Le Monde нашри хабар берди.
Элизабет Борннинг фикрича, электрон сигареталар ёшларни зарарли одатларга мойил қилади.
Борн мамлакатнинг чекишга қарши миллий режаси доирасида жорий қилинадиган тақиқ қачон кучга киришига аниқлик киритмаган. У француз ҳукумати яқинда тамакига қарши курашнинг янги режасини тақдим этишини маълум қилган, холос.
Бош вазирнинг қўшимча қилишича, мамлакатда ҳар йили 75 минг киши чекиш туфайли вафот этади.
Ушбу режа ёшларни ёмон одатларга мойил қиладиган бир марталик вейпларни тақиқлашга қаратилган.
«Бу рефлекс ва ҳаракат, ёшлар бунга тез мослашади. Чекиш шу ерда бошланади», — дея қўшимча қилган у.
Бир мартали ишлатиладиган электрон сигаретларнинг кўпчилигида пушти лимонад, мармелад ёки тарвуз каби ёшлар яхши кўрадиган ширин ва мевали таъми мавжуд.
Францияда вейп нархи одатда 8 евро (8,7 АҚШ доллари) ва 12 евро (13 АҚШ доллари) орасида.
Ҳозирда Францияда 18 ёшгача бўлган болаларга электрон сигарет сотишни тақиқловчи қонун бор, бироқ у амалда қўлланилмайди.
Ҳатто мамлакатда тамаки тарғиботи ва рекламаси ҳам чекланган.
